Así fala Penélope é un apaixonado percorrido que Marta Dacosta nos propón a través da escrita contemporánea das mulleres galegas. Estamos ante un proxecto inédito: unha antoloxía de xénero onde os nomes e as cronoloxías trenzan un relato comunal, con poemas que nos descobren como elas, con frecuencia, recoseron as palabras usadas para facelas lucir dun xeito distinto ou como, as máis das veces, optaron por teas novas. O resultado é unha selección que visibiliza as autoras, reivindica a literatura e lle ofrece á rapazada unha ambiciosa panorámica da poesía desde finais do século XX ata hoxe