A ética do coidado converteuse nun tema central e perentorio por mor da pandemia da covid-19. Un virus obrigounos a aceptar limitacións que nunca imaxinásemos, fíxonos un pouco menos arrogantes e seguros de nós mesmos. No ámbito da teoría, esta toma de conciencia debería conducir a un cambio de paradigma ou de marco mental, capaz de equilibrar razón e sentimento, no exercicio da tan manoseada «intelixencia emocional», cuxas achegas prácticas non sempre son evidentes. Hai que recoñecer que existe un dereito para ser coidado e un deber de coidar que non admite excepcións, que afecta a todo o mundo e cuxa responsabilidade ha de ser asumida individual e colectivamente. Tempo de coidados proponse acalar as voces que aínda se resisten a colocar o coidado nun lugar prominente, contrapoñéndoo á xustiza.